Зоранчо Пурески е љубител на уметноста и создавач на еден интересен стил на пишување во кој е вткаена целата негова љубов, талент и чувството за креативност, стил со кој го освои срцето на илјадници фанови ширум Македонија и пошироко.
Колку години пишувањето е твоја љубов?
Пишувањето, како љубов, одамна ми е. Љубител сум на збор исткаен со чувства уште од многу одамна. Но, активно со пишување, две години.
Од кое дело си најмногу задоволен?
Не можам да издвојам посебно дело, мисла, збор. Се обидувам секаде да ставам чувство, дел од душата. Дека тоа најубаво се препознава.
Пишувањето бара голема концетрација, креативност и идеи. Што најчесто те инспирира за да го земеш пенкалото во рака?
Животот. Болката. Љубовта. Среќата. Радоста. Луѓето. Инспирација има многу, само треба да ја препознаеш. И да те зграпчи онака убаво, па да те натера да ставиш душа на хартија или статус.
Колку ти лично се пронаоѓаш во своите текстови и дали некогаш си пишувал од лични искуства?
Се пронаоѓам во секој збор. Верувам и стојам позади тоа што го пишувам. Се она пишано е нечие искуство. Голем дел мое, се разбира.
Дали пишувањето е твојот единствен избор, или постои љубов и кон некоја друга професија?
Постои љубов и кон правото, секако. Јас сум човек кој е многу љубопитен и ме интересираат многу работи. Но, во пишувањето се пронаоѓам себе си, онаков каков што се замислувам, гледам, чувствувам.
Активен си, вежбаш, спортуваш?
За жал, многу малку. Порано повеќе, сега помалку. Не дека наоѓам оправдување во нешто, виновен сум за тоа и ми е јасно. Но, ете, во иднина ќе се промени и тоа.
Сведоци сме имаш илјадници фанови од спротивниот пол кој те обожаваат. Дали Зоранчо ја пронајде својата понежна половина во некоја од нив?
Се’ уште не. Можеби таа ќе ме најде некаде, дека мене, ете, не ми иде. Велат дека љубовта понекогаш не зависи од нас, дека ќе ти се случи кога најмалку очекуваш. Ете, нека си знае дека не ја очекувам, хаха.
Што ќе им препорачаш на сите оние кои ја читаат ЗАБАВА?
Да не се плашат да љубат. Да сакаат. Да знаат дека во животот најважно е да имаш некој кој те сака и некој на кого си му се’. Да знаат да бидат трпеливи и да веруваат дека ги очекува нешто убаво. Понекогаш љубовта не доаѓа во убаво пакување, туку мора сам да ја направиш и обликуваш. Не се откажувајте лесно од оние кои ги сакате и имајте повеќе разбирање! Ве сакам!
