Скијачката звезда Линдзи Вон ќе овозможи на обожавателите уникатен пристап во нејзиниот живот во серијата Chasing History (Лов на историјата) која премиерно ќе се прикаже на Еуроспорт на 5 февруари, недела, во 19 часот.
Серијалот ја следи најуспешната спуст скијачка, додека се обидува да го оствари својот сон и да го сруши рекордот во број на победи во трки на Светскиот куп и по четврти пат да настапи на Олимписките игри.
Првите епизоди ја прикажуваат агонијата на Линдзи Вон по падот и кршењето на коските на десната рака во ноември минатата година. Гледачите ќе имаат можност да го следат нејзиното опоравување од операцијата, рехабилитацијата и враќањето на скијањето. Овие ексклузивни снимки ќе ја приближат спортската легенда до обожавателите, како на снежната патека, така и надвор од неа.
„Кога во октомври минатата година го најавивме овој проект, им ветив на гледачите на Еуроспорт дека ќе им овозможам уникатен увид во мојот живот, на патеката и надвор од неа. Знаев дека ме чекаат многу предизвици, но не очекував дека веднаш на почетокот ќе морам да се соочам баш со таков предизвик. Снимањето само што започна, а јас ја скршив раката. Во првите епизоди гледачите ќе можат да го следат моето опоравување и мојата одлучност да се вратам на скиите, бидејки камерите на Еуроспорт ме следеа секој момент. Повредите се дел од животот на секој спортист, никогаш не знаеш што те чека. Навикнав да ги пребродам тешките моменти, но ова беше најтешко досега. Беше фрустрирачко, но сега се враќам и сум фокусирана на својата цел- рушење на рекордот на победи на Светскиот куп и настап на Олимписките игри. Еуроспорт ја следеше мојата кариера од првиот ден и ми е драго што гледачите на Еуроспорт ќе ме следат во ловот на историјата“, изјави Линдзи Вон.
Првите две епизоди со траење од по 30 минути, лично ќе ги води олимписката победничка, а ќе се емитуваат на 5 февруари во 19 часот. Премиерата го обележува враќањето на Линдзи на натпреварувачкото скијање во Алтернмаркт-Зауензе, каде го заврши својот спуст на 13 место, потоа Гармиш Партенкирхен и Кортина Д’Ампезо, каде Вон минатата година го сруши рекордот Ан Мосер-Прол на Светскиот куп со својата 37 победа.
„Лов на Историјата“ ќе се емитира на сите Еуроспорт канали и платформи, вклучувајќи го и Eurosport Player – услуга на барање на ексклузивна содржина во живо.
Еуроспорт, новиот дом на Олимписките игри во Европа, ја најави соработката со скијачката во октомври 2016. Целта е на навивачите да им се приблиќи начинот на кој Линзи живее надвор од скијачките терени, како се опушта во кругот на семејството и пријателите, нејзините лични страсти, како и увид во психичката состојба на спортистката која тежи кон спортска бесмртност.
Питер Хатон извршниот директор на Еуроспорт изјави:
„Линдзи е вистинска глобална звезда која својата кариера ја посвети на скијачките патеки и стана пример на милиони луѓе ширум светот. Гледачите во првите две епизоди на серијалот на 5 февруари ќе откријат зошто е тоа така и ќе ја следат како се справува со несреќата онака како само прваците тоа го прават. На сите платформи на Еуроспорт, нејзините навивачи ќе имаат увид како оваа светска спортистка тренира, подготвува и се се носи со предизвиците во нејзиниот лов на историјата.“
