Facebook оваа недела претстави персонален асистент, сличен на тие како Siri, Google Now и Cortana и со тоа влезе на овој очигледно популарен сегмент од пазарот. Наречен M, за разлика од Cortana и Siri, ќе нема пол и ќе биде дел од Messenger апликација, а интеракцијата ќе се прави во форма на пораки.
За почеток M ќе биде достапен за ограничен број на корисници кои што ќе имаат шанса да го тестираат, а се најавува достапност за сите корисници на Facebook во иднина.
За разлика од конкурентите, M ќе претставува еден вид на хибрид помеѓу технологијата, односно вештачката интелигенција и луѓето. Тоа значи дека покрај вештачката интелигенција, за работа на асистентот, односно одговорите што ги дава и функциите што ги извршува, ќе бидат задолжени и вистински луѓе.
Сега за сега не се истакнува колкава ќе биде бројката на луѓето, меѓутоа доколку M стане масовно користен сервис, бројката сигурно ќе биде во илјадници. Луѓето кои што ќе стојат зад сервисот имаат и свое име, односно ќе бидат нарекувани M Trainers.
Ваквиот начин на работа на Facebook M треба да овозможи повеќе функции на асистентот, нешто што конкурентите кои што се ослонуваат само на вештачката интелигенција не се во можност да го понудат.
Тоа значи дека корисниците ќе можат да поставуваат прашања и да задаваат задачи кои што доколку е потребно ќе бидат извршувани од страна на М тренерите. Примери кои што се истакнати вклучуваат нарачка на поклон за одредена личност, резервирање на патувања и ресторани, посложени прашања како каде е најдобро место за јадење во градот и слично.
Се истакнува дека М ќе им нуди на корисниците и можност да откажуваат одредени сервиси, како што е претплата за одреден телевизиски канал на пример, по што М тренерите ќе се јавуваат во потребните кол центри, па корисникот нема да треба да го губи времето чекајќи.
Facebook M ќе биде бесплатен сервис кој што во иднина треба да биде извор на приходи за компанијата. Може уште сега да се види дека сервисот ќе конкурира на повеќе други сервиси, а не само на персоналните асистенти.
